حاجات بتحطم شخصية طفلك [1]

• 2025-10-03

حاجات بتحطم شخصية طفلك [1]

إعداد: الفريق التربوي بروضة ارتقاء القرآنية المطورة - الواحة شرق

1. المقارنة

أي مقارنة بتقولها للطفل بتضرب شخصيتو ، بالذات مقارنتو مع أخوانه في البيت

مثلا: شوف أخوك ما شاء الله عليهو عمل الحاجة دي وإنت قاعد إلا يكلموك كم مرة

أو في السلبيات : هسي لو كان ده أخوك فلان ما كان حايعمل كدة

2. التدخل في كل شؤون الطفل

هنا الأم أو الأب بيتدخلو في كل صغيرة وكبيرة من قرارات طفلهم، حتى مثلا نوع اللعبة اللي دايرها أو ياكل من ياتو صحن أو يلبس ياتو هدوم أو يشتري شنو بقروشو... وما بدي الطفل أي اختيار

3. العقاب غير المتزن

وإنت بتعاقب طفلك

(1) لازم يعرف هو بتعاقب عشان شنو بالزبط

(2) يكون العقاب قدر الخطأ ويكون منوع ما نفس العقاب كل مرة

 (3) ما تجرح الذات

ما تقول مثلا : يا غبي

أو : في حياتي ما شفت أغبى منك 

أو: أصلو ما منك فايدة

أو : أصلك ما نافع

 (4) ما تجيب ليهو سيرة خالص لأخطاء عملها زمان لأنه كدة بتعمل كثافة حسية وبترسخ ليهو أنه زول كعب وسيء لأنه الطفل بيكون صورة عن نفسو من خلال كلام وتعابير الآخرين وبالذات الوالدين

موقعنا : أم درمان الواحة شرق مربع 5 ، شرق مول اليقين

للتواصل 0119111973